Xiaomi 17 qlobal bazara yanvarda çıxmağa hazırlaşır

Çində sentyabrda təqdim olunduqdan sonra böyük maraq yaradan Xiaomi 17 hələ də qlobal səhnəyə çıxmayıb. Rəsmi məlumat açıqlanmasa da, insayderlərin paylaşdığı son detallar cihazın beynəlxalq debütünə çox az qaldığını göstərir.

Məlumata görə, Xiaomi 17-in qlobal çıxışı 2026-cı ilin yanvarında baş tuta bilər. Smartfonun eyni vaxtda Hindistanda da satışa çıxacağı gözlənilir. Bu, Xiaomi-nin yeni flaqmanını dünya bazarında ilin ilk böyük texnoloji hadisələrindən birinə çevirə bilər.

Bu arada Geekbench-də 25113PN0EC model nömrəsi ilə görünən yeni Xiaomi telefonu diqqətləri üzərinə çəkib. Çox güman ki, bu, məhz Xiaomi 17-in qlobal versiyasıdır. Benchmark nəticələrinə görə, cihaz Android 16, 12 GB RAM və Snapdragon 8 Elite Gen 5 prosessoru ilə təchiz olunub. Testlərdə telefonun 3,176 single-core, 10,010 multi-core xal toplaması onun performansının nə qədər iddialı olacağını göstərir.

Qlobal versiyanın Çin modelinə tam uyğun gələcəyi deyilir — yəni bizi 6.3 düymlük LTPO AMOLED 120Hz ekran, üçlü 50MP arxa kamera, 50MP ön kamera və 7,000mAh batareya kimi güclü xüsusiyyətlər gözləyir. Üstəlik, 100W naqilli və 50W naqilsiz sürətli enerji doldurma bu modelin flaqmanlar arasında ciddi rəqib olacağına işarə edir.

Xiaomi 17-in qlobal səhnəyə çıxışı yaxınlaşdıqca daha çox detalları görəcəyik — görünür, 2026-cı ilin yanvarı smartfon həvəskarları üçün olduqca maraqlı keçəcək.