OnePlus 15-in yeni dizaynı Dune rəngi ilə göstərildi

OnePlus 15 haqqında son günlər bir çox məlumat sızmışdı, indi isə şirkət rəsmi görüntüləri paylaşaraq yeni rəng seçimini təsdiqləyib. Flagman model artıq Dune adlanan xüsusi rəngdə təqdim olunur.

OnePlus-un açıqlamasına görə, Dune rəngi qum təpələrindən ilhamlanıb və telefona “Ice skin” adlanan unikal toxunuş hissi bəxş edir. Cihazda aviasiya dərəcəli nano-seramik metal çərçivə istifadə olunub və kənarları daha yumru formadadır.

Şirkət bildirib ki, bu çərçivə titana nisbətən daha yüngül olacaq və istilik yayılmasını daha yüksək səviyyədə təmin edəcək. Bunun üçün üçmərhələli yeni istehsal prosesi tətbiq olunur: əvvəlcə hərbi standartlara uyğun mikro-ark oksidləşmə, sonra isə xüsusi ion rəngləmə və nəhayət, nano-gözenek bağlama prosesi.

Paylaşılan şəkillərdə həm də yenilənmiş kvadrat arxa kamera modulu görünür. Dizayn baxımından bu modul OnePlus 13 seriyasını xatırladır. Yeni smartfon arxada üçlü kamera sistemi ilə təchiz ediləcək.

Bununla yanaşı, OnePlus ön panel dizaynını da rəsmi olaraq açıqlayıb. OnePlus 15 modeli 1.15 mm nazik çərçivələrə sahib düz ekran ilə gələcək.

Son sızıntılara görə, smartfon 6.78 düymlük 1.5K panel, 165 Hz yenilənmə tezliyi ilə təklif olunacaq. Rəng seçimləri isə Absolute Black, Dune və Mist Purple olacaq.