Motorola Edge 70: Ultra-nazik dizayn ilə

Motorola Edge 70 sızdırıldı: “İnanılmaz dərəcədə nazik” dizayn və Pantone rəngi

Motorola Edge 70 barədə yeni məlumatlar ortaya çıxıb. Bir neçə ay əvvəl cihazın render görüntüsü internetdə yayılmışdı və dizayn baxımından Edge seriyasına xas standart elementlərə sahib idi. Lakin məşhur sızdırıcı Evan Blass bu dəfə telefonun rəsmi görünüşünə bənzər yeni şəkil paylaşıb və dizayn əvvəlkindən tamamilə fərqli görünür.

Yeni görüntülərdə Motorola Edge 70 diqqətçəkən detalları ilə ortaya çıxır. Kamera adacığındakı dörd dairənin (üç kamera və bir LED işıq) ətrafındakı parlaq yaşıl vurğular və yan tərəfdəki uyğun rəngdə düymə əvvəlki sızmalarda mövcud deyildi.

Bundan başqa, modelin düz ekran ilə gələcəyi də görünür – ən azından Edge 60 kimi kəskin əyri deyil. Arxa tərəfdəki kiçik kvadrat işarəsi isə Motorola-nın yenidən Pantone ilə əməkdaşlıq etdiyini göstərir. Bu, cihazın daha çox rəng seçimləri ilə təqdim ediləcəyi ehtimalını gücləndirir.

Ən maraqlı detal isə şüardır: “İnanılmaz dərəcədə nazik və heyrətamiz dərəcədə möhkəm”. Hazırda Apple və Samsung arasındakı rəqabət bazarda naziklik trendini ön plana çıxarıb. Edge 60 modeli 7.9 mm (bəzilərində 8.2 mm) qalınlığa sahib idi və xüsusi fərqlənmirdi.

Motorola indiyədək qatlanan Razr modelləri istisna olmaqla, 7 mm-dən aşağı telefon istehsal etməyib. İndi isə hamının maraqlandıran sual budur: Motorola nə qədər naziləşə bilər?